Athuganir á vistgerðum og fuglum voru gerðar. Gróðurfar er frekar fábreytt. Fjórtán vistgerðir voru kortlagðar en af þeim þekur mosahraunavist um 70% rannsóknarsvæðisins en mosamelavist hefur um 18% þekju. Þrjár vistgerðir hafa tiltölulega hátt náttúruverndargildi en þekja ekki stóran hluta rannsóknarsvæðisins. Skráðar hafa verið 95 tegundir æðplantna á rannsóknarsvæðinu og eru þær allar útbreiddar og algengar. Fuglalíf er fábreytt og þéttni lítil. Þúfutittlingur, heiðlóa og spói eru ríkjandi, en rjúpa og sólskríkja verpa líka á svæðinu. Framkvæmdir á svæðinu myndu skerða vistgerðir staðbundið. Áhrif á fuglalíf verða á framkvæmdatíma en til lengri tíma lítil.
